பயணி யார்?

மிகச் சுருக்கமாக:

நான் யார்?

🌳 ஸ்ரீதரன். சென்னை.

👔 இந்திய அயலுறவுத்துறை (Indian Foreign Service). எனவே, நாடோடி.

📕 உலகில் முதலாவதாக: சீனத்திலிருந்து தமிழுக்கு நேரடி மொழிபெயர்ப்பு நூலின் ஆசிரியர் ('வாரிச் சூடினும் பார்ப்பவரில்லை'). இலக்கியம்/சீனமொழி பற்றி 4 நூல்கள்.

👌🙌🤝 வாழ்க்கைல ரசிக்கணும், உதவணும், பகிரணும். அவ்ளோதாங்க. ❤️

மேலதிக விவரங்களுடன்:

பயணி தரன் என்னும் ஸ்ரீதரன் மதுசூதனன் சென்னையைச் சேர்ந்தவர். இந்திய அயலுறவுப் பணி (Indian Foreign Service - IFS) அதிகாரி. எழுத்துத்துறையில் இவரது புனைப்பெயர், பயணி.

பட்டப்படிப்பில் அறிவியலையும் (Science), நான்கு மேல் பட்டப் படிப்புகளாக வணிக மேலாண்மை (Masters in Business Administration - MBA, Colorado, USA), பொது நிர்வாகம் (Masters in Public Administration), மனிதவள மேலாண்மை (Masters in Human Resource Management), இதழியல் (PG Dip in Journalism) ஆகியவற்றையும் பயின்றவர். சீனாவில் பெய்சிங் பொருளாதார நிர்வாகக் கல்லூரியில் (Beijing Institute of Economic Management) இரண்டு ஆண்டுகள் சீனமொழி கற்றவர்.

பதினான்கு ஆண்டுகள் சீனமொழிச் சூழலில் (பெய்சிங்கிலும் ஹாங்காங்கிலும் தாய்வானிலும்) பணியாற்றிய அனுபவம் உள்ளவர். மேலும், அமெரிக்காவிலும் ஃபிஜித் தீவுகளிலும் பணியாற்றியவர். தற்போது, இந்திய அயலுறவு அமைச்சகத்தின் தலைமையகத்தில் இந்திய அரசின் இணைச் செயலாளராகப் பணியாற்றுகிறார்.

‘வாரிச் சூடினும் பார்ப்பவரில்லை: கவித்தொகை – சீனாவின் சங்க இலக்கியம்’ என்னும் தலைப்பில் உலகில் முதன்முறையாகச் சீனமொழியிலிருந்து நேரடித் தமிழாக்கத்தில் காலச்சுவடு பதிப்பகம் வெளியிட்ட நூலின் ஆசிரியர்.

இவரது ‘சீன மொழி – ஒரு அறிமுகம்’ என்னும் நூலையும், நோபல் பரிசு பெற்ற சீன எழுத்தாளர் மோ-யான் எழுதிய "மாற்றம்" நாவலின் மொழிபெயர்ப்பையும் காலச்சுவடு வெளியிட்டுள்ளது.

'எளிதில் சீன மொழி பேச, பயனுள்ள 21 வாக்கியங்கள்!' எனும் நூலையும் வெளியிட்டுள்ளார்.

விகடன் மாணவப் பத்திரிகையாளர் திட்டத்தின் முதல் மாணவர் (1984). பின்பு ‘பிரம்மா செய்திக் கட்டுரைகள்’ எனும் அமைப்பின் நிறுவனர். நவீன நாடகங்களுக்கான ஐக்யா நாடகக்குழுவின் நிறுவனர். சிறுகதை எழுத்தாளர், கவிஞர், கட்டுரையாளர் (காலச்சுவடு, தீராநதி, கணையாழி, விகடன், தமிழ் இந்து, கல்கி உள்ளிட்ட இதழ்களில்). கல்வியாராய்ச்சி இதழ்களில் தமிழ் அகராதியியல் மற்றும் இலக்கியத்துக்கும் இயற்கைக்குமான உறவு பற்றிய ஆங்கிலக் கட்டுரைகளை எழுதியுள்ளார்.

மனைவி வைதேஹி, பன்னாட்டுக் கல்வியாளர். மகன் அபி, அமெரிக்காவில் ஹிப்-ஹாப் இசைக்கலைஞர். மகள் கீர்த்தனா, நெதர்லாந்தில் மொழியியல் மாணவி.

தகவல் தொடர்புக்கு: www.payani.com/contact

2021/06